“ຊຽງຂວາງເກມ”ຖືກສະເໜີໃຫ້ເລື່ອນໄປກ່ອນເພື່ອຕ້ານການລະບາດຂອງໂຄວິດ-19

“ຊຽງຂວາງເກມ”ຖືກສະເໜີໃຫ້ເລື່ອນໄປກ່ອນເພື່ອຕ້ານການລະບາດຂອງໂຄວິດ-19

ຫ້ອງການກະຊວງສາທາລະນະສຸກ ໄດ້ສະເໜີເຖິງພາກສ່ວນຕ່າງໆທີ່ກ່ຽວຂ້ອງ ໃຫ້ພິຈາລະນາເລື່ອນ ຫຼື ໂຈະການຈັດງານຄອນເສີດ ແລະ ງານຊຸມນຸມຕ່າງໆອອກໄປກ່ອນ ເນື່ອງຈາກສະຖານະການການແພ່ລະບາດຂອງເຊື້ອພະຍາດໂຄວິດ-19 ທີ່ກຳລັງເພີ່ມຂຶ້ນໃນຫຼາຍປະເທດທົ່ວໂລກ

ຫ້ອງການດັ່ງກ່າວໄດ້ອອກໜັງສືສະເໜີເມື່ອວັນທີ 28 ກຸມພາ 2020 ນີ້ ໂດຍອ້າງອີງເຖິງທິດຊີ້ນຳຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ຕອບໂຕ້ການລະບາດຂອງພະຍາດອັກເສບປອດຈາກໄວຣັດໂຄໂຣນາສາຍພັນໃໝ່ ຫຼື ໂຄວິດ-19, ສະພາບການລະບາດຂອງພະຍາດດັ່ງກ່າວໃນທົ່ວໂລກ ແລະ ການກະກຽມງານຄອນເສີດ ແລະ ກິດຈະກຳອື່ນໆທີ່ຈະຈັດຂຶ້ນໃນນະຄອນຫຼວງວຽງຈັນ

ໜັງສືສະເໜີດັ່ງກ່າວລະບຸວ່າ ເພື່ອສືບຕໍ່ປ້ອງກັນບໍ່ໃຫ້ໂຄວິດ-19ແພ່ລະບາດໃນ ສປປ ລາວ, ຫ້ອງການກະຊວງສາທາລະນະສຸກຈຶ່ງສະເໜີມາຍັງທ່ານ ເພື່ອຂໍທິດຊີ້ນຳຈາກຂັ້ນເທິງ ແລະ ພາກສ່ວນກ່ຽວຂ້ອງ ເພື່ອພິຈາລະນາເລື່ອນ ຫຼື ໂຈະຊົ່ວຄາວການຈັດກິດຈະກຳຕ່າງໆທີ່ມີມວນຊົນເຂົ້າຮ່ວມຈຳນວນຫຼາຍ ໂດຍສະເພາະແມ່ນ ງານຄອນເສີດ, ງານກີລາ ແລະ ງານຊຸມນຸມຕ່າງໆອອກໄປກ່ອນ ຈົນກວ່າສະພາບການລະບາດຂອງພະຍາດດັ່ງກ່າວຈະຜ່ອນຄາຍລົງ

ຂະນະທີ່ບົດລາຍງານການລະບາດຂອງພະຍາດດັ່ງກ່າວຂອງກະຊວງສາທາລະນະສຸກຕໍ່ກັບກົມການເມືອງສູນກາງພັກ ລົງວັນທີ 27 ກຸມພາ 2020 ໄດ້ລະບຸເຖິງການປະເມີນຄວາມສ່ຽງຂອງການລະບາດໃນປະເທດ ໂດຍໄດ້ຍົກເອົາແຜນການຈັດງານສຳຄັນຕ່າງໆທີ່ກຳລັງຈະມີຂຶ້ນ ທັງກອງປະຊຸມລະດັບສາກົນ, ງານມະຫະກຳກີລາແຫ່ງຊາດຄັ້ງທີ 11 ທີ່ຊຽງຂວາງ, ການສະເຫຼີມສະຫຼອງທົ່ງໄຫຫິນເປັນມໍລະດົກໂລກ ແລະ ງານບຸນແຫ່ພະເຈົ້າອົງຫຼວງ ທີ່ຈະມີປະຊາຊົນຈຳນວນຫຼາຍເຂົ້າຮ່ວມ

ບົດລາຍງານລະບຸວ່າ ທາງກະຊວງສາທາລະນະສຸກ ໄດ້ກະກຽມທີມແພດເພື່ອຮັບໃຊ້ງານມະຫະກຳກີລາແຫ່ງຊາດ ແລະ ບຸນຕ່າງໆໄດ້ໃນລະດັບໜຶ່ງ, ພາກລັດ-ອົງການຈັດຕັ້ງສາກົນ ປະກອບສ່ວນເຄື່ອງມືອຸປະກອນຮອງຮັບການລະບາດຈຳນວນໜຶ່ງ ແລະ ທີມແພດໄດ້ຮັບການອົບຮົມ ແລະ ປະຕິບັດໄດ້ດີ ແລະ ປະຊາຊົນກໍມີຄວາມຮັບຮູ້ຫຼາຍຂຶ້ນໃນການປ້ອງກັນຕົນເອງ. ແຕ່ວ່າ ຍັງມີຄວາມທ້າທາຍຫຼາຍດ້ານທີ່ອາດເຮັດໃຫ້ມີຜົນກະທົບຫຼາຍດ້ານ ສະນັ້ນທາງກະຊວງສາທາລະນະສຸກ ຈຶ່ງໄດ້ສະເໜີໃຫ້ເລື່ອນງານມະຫະກຳກີລາແຫ່ງຊາດ ແລະ ບຸນຕ່າງໆທີ່ຈະຈັດຂຶ້ນໃນເດືອນມີນານີ້ໄປກ່ອນ ຈົນກວ່າສະພາບການລະບາດຈະຄວບຄຸມໄດ້ເປັນປົກກະຕິ

ທັງນີ້ ເດີມທີແລ້ວ ມະຫະກຳກີລາແຫ່ງຊາດມີກຳນົດການທີ່ຈະຈັດຂຶ້ນໃນລະຫວ່າງວັນທີ 22 ມີນາ – 1 ເມສາ 2020 ເຊິ່ງແຂວງຊຽງຂວາງເປັນເຈົ້າພາບ

ນີ້ບໍ່ແມ່ນຄັ້ງທຳອິດທີ່ມີການສະເໜີໃຫ້ເລື່ອນມະຫະກຳກີລາແຫ່ງຊາດຄັ້ງທີ 11 ເພາະເມື່ອຜ່ານມາກໍຖືກສະເໜີໃຫ້ເລື່ອນມາແລ້ວ ເນື່ອງຈາກປະເທດລາວປະສົບເຫດໄພພິບັດນໍ້າຖ້ວມຢ່າງໜັກໜ່ວງ

ຂ່າວທົ່ວໄປ