ທຣັມຄິດໜັກ ເນື່ອງຈາກໄດ້ສຳຜັດ ຄົນໃກ້ຊິດຕິດເຊື້ອ ໂຄວິດ 19

ທຣັມຄິດໜັກ ເນື່ອງຈາກໄດ້ສຳຜັດ ຄົນໃກ້ຊິດຕິດເຊື້ອ ໂຄວິດ 19

ສຳນັກຂ່າວຊິເອັນເອັນ ຂອງເມກາເອງລາຍງານມື້ນີ້ 13 ມີນາ 2020 ວ່າ ແຫຼ່ງຂ່າວໃກ້ຊິດກັບໂດນັລ ທຣັມ ປະທານາທິບໍດີຂອງສະຫະລັດອາເມລິກາ ໄດ້ເປີດເຜີຍວ່າ ທຣັມ ຮູ້ສຶກຢູ່ບໍເປັນສຸກ ມີຄວາມວິຕົກກັງວົນຫຼາຍ ເນື່ອງຈາກໄດ້ສຳຜັດໃກ້ຊິດກັບບຸກຄົນຕິດເຊື້ອຫຼາຍຄົນ ແລະໜຶ່ງໃນນັ້ນຄື ທ່ານ ຟາເບວ ວາກາເຕັນ (Fabio Wajngarten) ເລຂາທິການຝ່າຍສື່ຂອງປະທານນາທິບໍດີບຣາຊີວ ເຊິ່ງຜົນກວດອອກມາໃນວັນພະຫັດທີ 12 ມີນາຢືນຢັນວ່າບຸກຄົນດັ່ງກ່າວຕິດເຊື້ອໂຄວິດ

ນອກຈາກນີ້ຍັງມີອີກຫຼາຍຄົນທີ່ ທຣັມໄດ້ພົບປະໂອ້ລົມຢ່າງໃກ້ຊິດກັບເຈົ້າໜ້າທີ່ຫຼາຍຄົນທີ່ຕອນນີ້ລ້ວນແຕ່ໄດ້ຮັບການຢືນຢັນວ່າຕິດເຊື້ອໂຄວິດໄປແລ້ວ

ສຳນັກຂ່າວຊີເອັນເອັນຍັງລາຍງານອີກວ່າ: ທ່ານ ວາກາເຕັນ ເຈົ້າໜ້າທີ່ລະດັບສູງດ້ານສື່ມວນຊົນຂອງບຣາຊີວທ່ານນີ້ໄດ້ຕິດຕາມປະທານາທິບໍດີຂອງບຣາຊີວ ໂບໂຊນາຣູ ໃນໂອກາດເດີນທາງຢ້ຽມຢາມສະຫະລັດ ລວມທັ້ງໄດ້ນັ່ງໂຕະໃນງານລ້ຽງອາຫານຄ່ຳຕ້ອງຮັບ ແລະເບື້ອງຕົ້ນຍັງບໍ່ທັນຮູ້ວ່າຜູ້ກ່ຽວຕິດເຊື້ອມາຈາກໃສ

ສຳນັກຂ່າວເອບີຊີ ລາຍງານຕື່ມວ່າ: ປະທານາທິບໍດີໂດນັລ ທຣັມ ຍັງບໍ່ຍອມຕອບຄຳຖາມນັກຂ່າວວ່າຕົນຈະໄປກວດຫຼືບໍ ຫຼັງຈາກຜົນກວດຂອງທ່ານ ວາກາເຕັນ ຄົນໃກ້ຊິດຂອງປະທານາທິບໍດີບຣາຊີວທີ່ຕົນພົວພັນໃກ້ຊິດຕິດເຊື້ອ

ຂ່າວທົ່ວໄປ