ປະເທດໄທປະກາດເລື່ອນສົງການໄປເດືອນ”ກໍລະກົດ”ເພື່ອຫຼີກລ່ຽງ COVID-19

ປະເທດໄທປະກາດເລື່ອນສົງການໄປເດືອນ”ກໍລະກົດ”ເພື່ອຫຼີກລ່ຽງ COVID-19

ໄທປະກາດເລື່ອນບຸນປີໃໝ່ໄທ ຫຼື ເທດສະການສົງການອອກໄປ ຫວັງສະກັດຄົນຈຳນວນຫຼາຍເດີນທາງກັບບ້ານ ຫຼີກລ່ຽງການແພ່ລະບາດຂອງໄວຣັດໂຄໂຣນາສາຍພັນໃໝ່. ສື່ໄທລາຍງານເມື່ອວັນທີ 16 ມີນາ 2020 ວ່າ ທ່ານ ນາງ ໄຕຣສຸລີ ໄຕຣສະຣະນະກຸນ ຮອງໂຄສົກປະຈຳວຳນັກນາຍົກລັດຖະມົນຕີເປີດເຜີຍວ່າ ເທດສະການສົງການປີນີ້ຂອງໄທ ຈະເລື່ອນໄປຈັດໃນເດືອນກໍລະກົດແທນ ຈາກປົກກະຕິໃນວັນທີ 13-15 ເມສາ 2020 ເພື່ອຫຼີກລ່ຽງການແພ່ລະບາດຂອງພະຍາດຕິດເຊື້ອໄວຣັດໂຄໂຣນາ 2019 ຫຼື ໂຄວິດ-19 (COVID-19)

ເຫດນີ້ເຮັດໃຫ້ວັນທີ 13-15 ເມສາ 2020 ນີ້ ຢູ່ໄທຈະບໍ່ມີການພັກວຽກ ແລະ ຍັງຄົງເຮັດວຽກຢ່າງເປັນປົກກະຕິ.ການເຄື່ອນໄຫວນີ້ເກີດຂຶ້ນໃນຂະນະທີ່ໄທພົບຜູ້ຕິດເຊື້ອໄວຣັດໂຄໂຣນາສາຍພັນໃໝ່ອີກ 32 ຄົນເມື່ອບໍ່ດົນມານີ້ ເຮັດໃຫ້ຈຳນວນສະສົມຜູ້ຜູ້ຕິດເຊື້ອມີຢ່າງໜ້ອຍ 114 ຄົນ ເຊິ່ງເປັນການເພີ່ມຂຶ້ນຫຼາຍທີ່ສຸດນັບຕັ້ງແຕ່ເລີ່ມມີການລະບາດໃນປະເທດ

ນອກຈາກນີ້ ເທດສະການສົງການຂອງໄທຍັງເປັນໄລຍະທີ່ປະຊາຊົນຈຳນວນຫຼາຍເດີນທາງກັບບ້ານ ເຊິ່ງອາດເຮັດໃຫ້ເກີດການແພ່ກະຈາຍຂອງໄວຣັດດັ່ງກ່າວເກີດຂຶ້ນຢ່າງວ່ອງໄວກວ່າໃນຕອນນີ້. ມາດຕະການເລື່ອນເທດສະການສົງການຈຶ່ງເປັນໜຶ່ງໃນວິທີການທີ່ລັດຖະບານໄທໃຊ້ຄວບຄຸມການແພ່ລະບາດຂອງພະຍາດ

ທັງນີ້ ເທດສະການສົງການຂອງໄທເປັນເທດສະການທີ່ມີຂຶ້ນໃນໄລຍະດຽວກັບບຸນປີໃໝ່ລາວ ແລະ ມີລັກສະນະການສະເຫຼີມສະຫຼອງທີ່ຄ້າຍຄືກັນ ຄືມີການຫົດນໍ້າເຊິ່ງກັນ ແລະ ກັນ. ແນວໃດກໍຕາມ ຢູ່ ສປປ ລາວ ຍັງບໍ່ທັນມີມາດຕະການລັກສະນະດຽວກັນກັບໄທກ່ຽວກັບບຸນປີໃໝ່ລາວເທື່ອ

ແຕ່ກໍມີບາງພາກສ່ວນທີ່ໄດ້ອອກມາສະເໜີໃຫ້ມີການໂຈະບາງກິດຈະກຳທີ່ມີຜູ້ເຂົ້າຮ່ວມເປັນຈຳນວນຫຼາຍໃນໄລຍະງານບຸນດັ່ງກ່າວນີ້ ໂດຍສະເພາະກໍແມ່ນແຂວງຫຼວງພະບາງທີ່ໄດ້ອອກມາສະເ?ີເຖິງລັດຖະບານໃຫ້ພິຈາລະນາໂຈະການແຫ່ຫວໍ່, ການປະກວດນາງສັງຂານ ແລະ ການຕົບພະທາດຊາຍ ເປັນຕົ້ນ

ຂ່າວທົ່ວໄປ