ສາວໄຮໂຊພົບຕິດເຊື້ອໂຄວິດ-19 ຜູ້ດັບຝັນຫວຽດນາມໃນການປະກາດເປັນເຂດປອດເຊື້ອ

ສາວໄຮໂຊພົບຕິດເຊື້ອໂຄວິດ-19 ຜູ້ດັບຝັນຫວຽດນາມໃນການປະກາດເປັນເຂດປອດເຊື້ອ

ເປັນເວລາ 22 ມື້ ທີ່ ສສ ຫວຽດນາມ ບໍ່ພົບຜູ້ຕິດເຊື້ອໄວຣັດໂຄວິດ-19 ລາຍໃໝ່ ສ່ວນຜູ້ຕິດເຊື້ອລາຍເກົ່າ ຈໍານວນ 16 ຄົນ ກໍ່ໄດ້ຮັບການຮັກສາຈົນຫາຍດີ ໂດຍທີ່ບໍ່ມີໃຜເສຍຊີວິດຈາກພະຍາດດັ່ງກ່າວ

ລັດຖະບານ ສສ ຫວຽດນາມພາກພູມໃຈຫຼາຍ ແລະ ກໍາລັງລໍຖ້າໃຫ້ຄົບ 1 ເດືອນ ເພື່ອຈະປະກາດໄຊຊະນະວ່າ “ຫວຽດນາມເປັນເຂດປອດໄວຣັດໂຄວິດ-19”, ແຕ່ສຸດທ້າຍເຫດການນີ້ກໍ່ດັບຝັນຊາວຫວຽດນາມ ເນື່ອງຈາກວ່າ “ຫງວຽນ ຫ່ອງ ນຸງ” (Nguyen Hong Nhung) ສາວຫວຽດນາມ ອາຍຸ 26 ປີ ຈາກເມືອງຮາໂນ້ຍ ລາວມາຈາກຄອບຄົວຮັ່ງມີ, ພໍ່ເປັນເຈົ້າຂອງທຸລະກິດເຫຼັກກ້າຂະໜາດໃຫຍ່ຂອງປະເທດ, ລາວມີວິຖີຊີວິດທີ່ຫຼູຫຼາ, ໄຮໂຊ ແລະ ເດີນທາງໄປທ່ຽວຕ່າງປະເທດຢູ່ຕະຫຼອດ

ຫຼ້າສຸດ ລາວໄດ້ເດີນທາງໄປຢຸໂຣບ ໂດຍບິນໄປຫຼາຍເມືອງໃຫຍ່ໃນຫຼາຍປະເທດຄື: ວັນທີ 16 ກຸມພາ 2020 ບິນໄປຫາ “ຫງວຽນ ຮົງ ງາ” (Nguyen Hong Nga) ຜູ້ເປັນເອື້ອຍຂອງລາວ ອາຍຸ 27 ປີ ຊຶ່ງໃຊ້ຊີວິດຢູ່ນະຄອນຫຼວງລອນດອນ ປະເທດອັງກິດ. ວັນທີ 18 ກຸມພາ ນຸງ ແລະ ງາ ບິນໄປເມືອງມິລານ ປະເທດອີຕາລີ ເພື່ອເບິ່ງແຟຊັນໂຊຂອງ GUCCI ໃນມິລານແຟຊັນວີກ, ວັນທີ 20 ກຸມພາ ບິນກັບເມືອງລອນດອນ ເພື່ອໄປຮ່ວມງານອີເວັ້ນ ທີ່ The British Museum, ວັນທີ 25 ກຸມພາ ບິນໄປ ນະຄອນຫຼວງປາຣີສ ປະເທດຝຣັ່ງ ເພື່ອເບິ່ງການສະແດງ Saint Laurent ໃນງານປາຣີສແຟຊັ່ນວີກ, ຊື່ງໃນລະຫວ່າງທຣິບ 2 ສາວ ກໍ່ທ່ອງທ່ຽວປາຕີ້, ກິນດື່ມ ແລະ ເລາະຊັອບປິ້ງໄປນໍາ

ມາຮອດວັນທີ 29 ກຸມພາ ຂະນະທີ່ຢູ່ປາຣີສ ນຸງ ເລີ່ມມີອາການໄອ ແຕ່ບໍ່ຄິດວ່າຕົນເອງຈະຕິດເຊື້ອໄວຣັດ ເລີຍທ່ຽວຕໍ່ຈົນຮອດມື້ສຸດທ້າຍ. ກ່ອນທີ່ ນຸງ ແລະ ງາ ຈະບິນກັບຮ່າໂນ້ຍເມື່ອວັນທີ 2 ມີນາ ໂດຍສາຍການບິນ ຫວຽດນາມແອລາຍ, ເມື່ອກັບຮອດຮ່າໂນ້ຍແລ້ວ 2 ສາວ ກໍ່ບໍ່ໄດ້ກັກຕົວແຕ່ຢ່າງໃດ ກໍ່ກັບໄປປາກົດຕົວໃນງານສັງສັນອີກ. ຈົນເຖິງວັນທີ 5 ມີນາ, ນຸງ ເລີ່ມມີອາການໄຂ້ເລີຍໄປຫາໝໍ ແລະ ພົບວ່າ ລາວເປັນຜູ້ຕິດເຊື້ອໄວຣັດໂຄວິດ-19 ຄົນທີ 17 ຂອງປະເທດ

ຈາກນັ້ນກໍ່ໄດ້ສືບຫາຄົນໃກ້ຊິດ ແລະ ຄົນທີ່ມີປະຕິສໍາພັນກັບ ນຸງ ກໍ່ເລີ່ມຂຶ້ນ ເລີ່ມຕັ້ງແຕ່ຄົນໃນຄອບຄົວ ແລະ ຄົນແວດລ້ອມ, ຊຶ່ງພົບຄົນທີ່ຕິດເຊື້ອແລ້ວ 3 ຄົນຄື ງາ ຜູ້ເປັນເອື້ອຍ, ປ້າ ອາຍຸ 64 ປີ ແລະ ຄົນຂັບລົດສ່ວນຕົວ ອາຍຸ 27 ປີ. ສ່ວນຄົນອື່ນໆ ລວມທັງພໍ່ກໍ່ຕ້ອງຖືກກັກຕົວເບິ່ງອາການ

ລັດຖະບານ ສສ ຫວຽດນາມ ສັ່ງປິດຫົນທາງ ບໍລິເວນໃກ້ບ້ານພັກຂອງ ນຸງ ແລ້ວສົ່ງເຈົ້າໜ້າທີ່ໄປສີດຢາຂ້າເຊື້ອ, ເຮັດຄວາມສະອາດ. ຈາກນັ້ນ, ກໍ່ຕ້ອງຕິດຕາມຕົວຄົນໂດຍສານເຮືອບິນຖ້ຽວດຽວກັບ ນຸງ ຈາກລຸນດອນ-ຫວຽດນາມ ຈໍານວນ 217 ຄົນ ເພື່ອມາກັກຕົວ ແລະ ກວດຫາເຊື້ອອີກດ້ວຍ. ທັງນີ້, ນຸງ ແລະ ງາ ນັ່ງມາໃນຊັ້ນທຸລະກິດ, ຊຶ່ງມີຜູ້ໂດຍສານ ຈໍານວນ 30 ຄົນ ແລະ ຫຼາຍຄົນເປັນບຸກຄົນຊັ້ນນໍາຂອງປະເທດ ເຊັ່ນ ລັດຖະມົນຕີ, ຄະນະເຮັດວຽກເສດຖະກິດ, ນັກວິຊາການ, ຊຶ່ງໃນເບື້ອງຕົ້ນພົບຜູ້ໂດຍສານຖ້ຽວບິນດຽວກັບນຸງ ແລະ ງາຕິດເຊື້ອແລ້ວ 9 ຄົນ ໃນນັ້ນ, ເປັນຊາວອັງກິດ 7 ຄົນ, ເມັກຊິໂກ 1 ຄົນ ແລະ ອຽກລັງ (ໄອ້ແລນ) 1 ຄົນ ອາຍຸລະຫວ່າງ 58-74 ປີ ເຮັດໃຫ້ 2 ສາວ ກາຍເປັນ “ຊຸບເປີ້ ສະເປຣດເດີ (Super Spreader)” ຫຼື ຜູ້ແພ່ເຊື້ອເປັນວົງກວ້າງ ເປັນທີ່ຮຽບຮ້ອຍ.

ບັນນາທິການແຟຊັ່ນຂອງ ມິລານແຟຊັນວີກ ແລະ ຄົນດັງ ທີ່ມາຮ່ວມງານຕ້ອງກັກຕົນເອງ ພ້ອມຂໍໃຫ້ຜູ້ທີ່ມາຮ່ວມງານຈາກປະເທດຕ່າງໆ ກັກຕົນເອງເມື່ອກັບເຖິງປະເດທຂອງຕົນ. (ສໍານັກຂ່າວ South China Morning Post ອ້າງວ່າມີຜູ້ຮ່ວມງານຈາກສິງກະໂປ ແລະ ໄທ. ສ່ວນສື່ໄທລາຍງານວ່າ ແມ່ນນັກສະແດງສາວ “ໃໝ່ ດາວິກາ” ຊຶ່ງໄດ້ກັກຄົນເອງແລ້ວ). ສິລະປິນເຄ-ປັອບ ຈາກເກົາຫຼີໃຕ້ຄົນໜຶ່ງໄປຮ່ວມງານມິລານແຟຊັ່ນວີກພ້ອມຜູ້ຕິດຕາມ ປາກົດວ່າຜູ້ຕິດຕາມຕິດເຊື້ອແລ້ວ, ຕົວສິລະປິນເອງຜົນກວດເປັນລົບ ແຕ່ກໍ່ຍັງຕ້ອງກັກຕົນເອງຢູ່.

ນອກຈາກນີ້, ຍັງມີເພື່ອນໄຮໂຊຂອງ ນຸງ ອີກຄົນໜຶ່ງທີ່ຊື່ “ທີເອນ” (T.N.) ອາຍຸ 24 ປີ ເປັນລູກສາວນັກທຸລະກິດຊື່ດັງຂອງຫວຽດນາມ, ທີເອນ ແລະ ນຸງ ໄປງານລ້ຽງນໍາກັນທີ່ລອນດອນ. ພໍຮູ້ວ່ານຸງໄຂ້, ທີເອນ ກໍ່ໄປກວດ ປາກົດວ່າຕິດເຊື້ອມາແທ້, ພໍ່ຂອງລາວເລີຍສົ່ງເຮືອບິນສ່ວນຕົວໄປຮັບລູກສາວ ຈາກລອນດອນ ເພື່ອຈະບໍ່ແຜ່ເຊື້ອໃຫ້ຄົນອື່ນ.

ເລື່ອງລາວຂອງນຸງ ແລະ ງາ ເຮັດໃຫ້ຄົນຫວຽດນາມແຕກຕື່ນກັນທັ້ງປະເທດ, ຄົນເລີ່ມແຫ່ກັນໄປຊື້ອາຫານ ແລະ ສິນຄ້າຕ່າງໆມາກັກຕຸນໄວ້ ແລະ ຫຼາຍຄົນກໍ່ໃຈຮ້າຍໃຫ້ 2 ສາວ ທີ່ຂາດຄວາມຮັບຜິດຊອບຕໍ່ສັງຄົມ ຈົນຕ້ອງປິດອິນສະຕາແກຣມໄປເປັນທີ່ຮຽບຮ້ອຍ

ຂ່າວທົ່ວໄປ