ໜ້າເຫັນໃຈ ເປັນຄູອາສາ7ກວ່າປີບໍ່ໄດ້ເຂົ້າລັດ ກັບມາຂໍຄວາມຊ່ວຍເຫຼືອຈາກໂຮງຮຽນເກົ່າເພື່ອຊີທິດເຍືອງທາງ

ໜ້າເຫັນໃຈ ເປັນຄູອາສາ7ກວ່າປີບໍ່ໄດ້ເຂົ້າລັດ ກັບມາຂໍຄວາມຊ່ວຍເຫຼືອຈາກໂຮງຮຽນເກົ່າເພື່ອຊີທິດເຍືອງທາງ

ເລື່ອງລາວສຸດເສົ້າຈາກໃຈຄູອາສາສະໝັກ 7 ປີ ທີ່ຍັງບໍ່ສີ້ນຫວັງ ກັບຄືນສູ່ໂຮງຮຽນເກົ່າເພື່ອຂໍຄວາມຊ່ວຍເຫຼືອແລະເພື່ອຊີທິດເຍືອງທາງ ກະແສຂ່າວເລື່ອງຄູອາສາສະໝັກທີ່ເຮັດວຽກມາເປັນເວລາດົນ ແຕ່ໄຮ້ວີ່ແວວການໄດ້ເຂົ້າລັດຖະກອນ ກິນເງິນເດືອນລັດ ເປັນເລື່ອງລາວທີ່ສັງຄົມອອນລາຍນໍາມາສົ່ງຕໍ່ວິພາກວິຈານເປັນຈໍານວນຫຼາຍ, ຫຼ້າສຸດ ມີອີກ 1 ກໍລະນີ ເຊິ່ງເປັນສິດເກົ່າຈົບຈາກໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ ຢູ່ນະຄອນຫຼວງວຽງຈັນ ທີ່ຜູ້ກ່ຽວກໍ່ເຮັດວຽກເປັນຄູອາສາມາເກືອບ 7ປີ ແຕ່ບໍ່ໄດ້ລັດ ຈຶ່ງກັບມາຂໍຄວາມຊ່ວຍເຫຼືອຈາກໂຮງຮຽນເກົ່າທີ່ເຄີຍສຶກສາຢູ່

ທ້າວຖຸຍ ເປັນນັກຮຽນຊົນເຜົ່າ ເຂົ້າມາຮຽນຢູ່ ຊັ້ນ ມ8(ຫ້ອງກຽມມະຫາວິທະຍາໄລ) ຂອງ ຮພຊ ທີ່ດົງໂດກ; ຈົບໃນສົກຮຽນ 2007-2008; ຫຼັງຈາກນັ້ນກໍເຂົ້າຮຽນຕໍ່ ມຊ 4 ປີແລະຈົບປະລິນຍາຕີ; ປີ 2013-2020 ແລ້ວກໍກັບບ້ານເກີດເມືອງນອນ ເພື່ອໄປເຮັດວຽກເປັນອາສາສະໝັກ ຢູ່ຫ້ອງການແຫ່ງໜຶ່ງ ທີ່ເມືອງສະມ້ວຍ ຂອງແຂວງສາລະວັນ

ເຊິ່ງຫ່າງຈາກບ້ານຕົນເອງ 20 ກວ່າກິໂລແມັດ; ໃນການເຮັດວຽກອາສາສະໝັກມາເປັນເວລາເກືອບ 7 ປີ ແຕ່ກໍບໍ່ໄດ້ບັນຈຸລັດຖະກອນ; ວັນທີ 14/7/2020 ຜູ້ກ່ຽວຈຶ່ງກັບມາຢາມໂຮງຮຽນ ຮພຊ ເພື່ອຂໍຄວາມຊ່ວຍເຫຼືອຈາກຄູພວກເຮົາ. ໃນການເດີນທາງອອກຈາກບ້ານຄັ້ງນີ້ ເພື່ອຂໍພອນສິ່ງສັກສິດເພື່ອໃຫ້ຊີວິດການເດີນທາງຄັ້ງນີ້ ເພື່ອຈຸດມຸ້ງໝາຍປາຍທາງກໍຄື ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ ເພື່ອໄປຂໍທິດຊີ້ນໍາຈາກຄູ ປະຈໍາຫ້ອງ ອຈ ນາງ ໄຫວພວງ ວິລະວົງແລະ ບັນດາຄູທີ່ເຄີຍສິດສອນລາວ ໃນ 1 ສົກຮຽນ ທີ່ເຮັດໃຫ້ລາວມີຄວາມອົບອຸ່ນ ແລະ ຄວາມສຸກເມື່ອຫວນຄືນ 10 ກວ່າປີທີ່ຜ່ານມາ; ຊ່ວງເວລາທີ່ຂຶ້ນນັ່ງເທິງລົດເມ ທ້າວຖຸຍ ກໍຮູ້ສຶກກະວົນກະວາຍ ທັງເປັນຫ່ວງທາງຫຼັງ ແລະ ບໍ່ຮູ້ຄວາມຫວັງເບື້ອງໜ້າ ເຮັດໃຫ້ຢາດນໍ້າຕາຕົກລົງໃສ່ພື້ນລົດເມຕະຫຼອດການເດີນທາງ

ສິ່ງທີ່ເຮັດໃຫ້ເປັນຫ່ວງໃນເບື້ອງຫຼັງຄື ເມຍທີ່ກໍາລັງອູ້ມລູກນ້ອຍ 2 ຄົນ ຜູ້ໜຶ່ງໄດ້ 2 ປີ ແລະ ອີກຜູ້ໜຶ່ງ ໄດ້ 6 ເດືອນ ທີ່ເມຍກຳລັງເອົາລູກເຈ່ຍໃສ່ບ່າເບື້ອງໜ້າ-ຫຼັງ ແລ້ວເຂົ້າໄປເຮັດໄຮ່ທີ່ຈອມພູ ເພື່ອກຽມເຂົ້າໄວ້ກິນໃນປີໜ້າ ຫ່ວງເບື້ອງໜ້າແມ່ນເງິນທີ່ມີໃນມື ບໍ່ຮອດ 1 ແສນກີບ ທີ່ເຫຼືອຈາກຄ່າລົດເມ ແລ້ວຈະເອົາເງິນໃສຈ້າງລົດກັບບ້ານລະນໍ້ ຍິ່ງຄິດນໍ້າຕາກໍຍິ່ງໄຫຼ ຈົນລາວບໍ່ກ້າເງີຍໜ້າເບິ່ງຜູ້ໂດຍສານທີ່ສັບປ່ຽນກັນຂຶ້ນ-ລົງລົດເມ ມາຮອດຄິວສາຍໃຕ້ ທີ່ນະຄອນຫຼວງວຽງຈັນກໍ່ພໍດີຕາເວັນຕົກດິນ; ໂທລະສັບກໍບໍ່ມີ. ລາວຈຶ່ງເຂົ້າໄປຖາມໂຊເຟີລົດຕຸກໆວ່າ

ແຕ່ນີ້ໄປຫາໂຮງຮຽນພອນສະຫວັນຈະເອົານໍາເທົ່າໃດ? ໂຊເຟີລົດຕອບວ່າ: 20 ພັນກີບ; ລາວຈຶ່ງຕັດສິນໃຈຍ່າງເອົາ ແຕ່ຄິວລົດຮອດ ຮພຊ ຄວາມບັງເອີນກໍ່ໄດ້ປະກົດຂຶ້ນ; ເມື່ອລາວກ້າວຂາເຂົ້າສູ່ປະຕູຮົ້ວໂຮງຮຽນ ລາວກໍໄດ້ປ່ອຍຮອຍຍິ້ມອອກມາ ເມື່ອເຫັນໂຮງຮຽນເກົ່າທີ່ຕົນເອງເຄີຍຮຽນຢູ່ທີ່ນີ້ ພໍຫຼຽວໄປທາງຫ້ອງການຄູ ກໍເຫັນໄຟຍັງເປີດຢູ່ ຍ້ອນວ່າມື້ນັ້ນທາງຄະນະນໍາໂຮງຮຽນພວມກະກຽມຈັດກອງປະຊຸມເພື່ອເຕົ້າລວມນັກຮຽນສອບເສັງຈົບຊັ້ນ ແລະ ຄູທຸກຄົນກໍໄດ້ເລີກການຄໍ່າ. ພໍດີຍາງເຂົາໄປຮອດຫ້ອງການໂຮງຮຽນ ຈຶ່ງໄດ້ພົບ ອຈ ໄຫວພວງ ທີ່ເປັນຄູ ປະຈໍາຫ້ອງ; ທັງສອງແນມເບີ່ງໜ້າກັນແລ້ວຄູກໍຮ້ອງຂຶ້ນວ່າ

ໂອະ ທ້າວຖຸຍ! ນ້ອງເປັນຈັ່ງໃດ? ມາຈັ່ງໃດ? ຄືມາຮອດໂຮງຮຽນພີ້?…ໂດຍ ສະບາຍດີອາຈານ ນ້ອງມາຢາມພວກອາຈານນີ້ແລ້ວ…..(ເລົ່າເລື່ອງລາວຕ່າງໆໃຫ້ຄູຟັງ) ຄູປະຈໍາຫ້ອງກໍທັງດີໃຈທີ່ໄດ້ເຫັນໜ້າລູກສິດ ແລະ ທັງກັ້ນນໍ້າຕາບໍ່ໄຫວເມື່ອໄດ້ຮັບຟັງເລື່ອງລາວຕ່າງໆ ເຮັດໃຫ້ຄູ ແລະ ນັກຮຽນຫຼາຍຄົນທີ່ໄດ້ຮັບຮູ້ເລື່ອງລາວ ບໍ່ມີໃຜເລີຍທີ່ສາມາດອົດກັ້ນນໍ້າຕາເອົາໄວ້ໄດ້. ຂະໜາດຂ້າພະເຈົ້າເອງທີ່ເປັນຜູ້ຊາຍ ເມື່ອໄດ້ເຫັນສະພາບລູກສິດຕົນເອງ ແລະ ຄວາມຈິງທີ່ປະກົດຢູ່ຕໍ່ໜ້າໂດຍບໍ່ຄາດຝັນວ່ານ້ອງຈະມີສະພາບທີ່ຂາດເຂີນຂະໜາດນີ້ ແລ້ວກໍອົດກັ້ນນໍ້າຕາເອົາໄວ້ບໍ່ໄຫວດອກ

ເມື່ອເປັນແນວນັ້ນທັງຄູ ແລະ ນ້ອງໆນັກຮຽນ ມ4 ແລະ ມ7. ກໍໄດ້ລະດົມກັນຜູ້ລະເລັກລະນ້ອຍ ເພື່ອຊ່ວຍເຫຼືອລາວ ຕາມຄວາມສາມາດຕົນເອງມີ
ທາງຄະນະນໍາໂຮງຮຽນກໍໄດ້ຂຽນໜັງສືສະເໜີໄປຍັງຂັ້ນເທິງເພື່ອພິຈາລະນາຊ່ວຍເຫຼືອລາວ ແຕ່ບໍ່ຮູ້ວ່າຜົນຈະອອກມາເປັນແນວໃດ?ທຸກໆມື້ລາວແມ່ນລໍຖ້າຟັງຄໍາຕອບ ແລະ ຄໍາຕອບນັ້ນຈະເປັນແນວໃດກໍຕ້ອງຍອມຮັບມັນ ເພາະສະຕາກໍາຂອງມະນຸດທຸກຄົນກໍລ້ວນແຕ່ແຕກຕ່າງກັນ ແລະ ສິ່ງທີ່ຄືກັນກໍຄືອິນຊີ, ຮ່າງກາຍ ແລະ ຄວາມທຸກທີ່ພວກເຮົາເປັນ

ບັນດາທ່ານຜູ້ອ່ານທັງຫຼາຍ ຂ້າພະເຈົ້າກໍບໍ່ຮູ້ຈະບັນຍາຍແນວໃດຕົນເອງກໍເປັນພຽງຄູສອນຄະນິດສາດ! ເມື່ອເຫດການມັນປະກົດເປັນຈິງຄືແນວນີ້ ເຖິງວ່າຂ້ອຍຂຽນບໍ່ມ່ວນກໍຂໍໂທດນໍາຫຼາຍໆ ແລະ ຂ້ອຍກໍຂຽນມາຈາກຄວາມຮູ້ສຶກ ແລະ ຄວາມເປັນຈິງທີ່ປະກົດຢູ່ຕໍ່ໜ້າ ແລະ ຢູ່ໃນໃຈຂອງຄູ ແລ້ວຈະເກັບມັນໄວ້ເຮັດຫຍັງແມ່ນບໍ່? ເພາະທຸກຄົນລ້ວນແລ້ວແຕ່ເລືອກເກີດບໍ່ໄດ້ ແຕ່ທຸກຄົນກໍມີຄວາມຫວັງທີ່ຈະປ່ຽນແປງຊີວິດໄດ້ ເຖິງແມ່ນວ່າຄູຈະມີເງິນເດືອນໜ້ອຍ ແຕ່ຮູ້ສຶກວ່ານໍ້າໃຈຄູບໍ່ເຄີຍທີ່ຈະຈືດຈາງ, ບາງຄັ້ງຄູສຸດທີ່ດີໃຈເມື່ອເຫັນລູກສິດຫຼາຍຄົນໄດ້ດີ

ຄູທຸກຄົນສຸດທີ່ຊື່ນຊົມ ແລະ ຊົມເຊີຍນ້ອງໆ ແຕ່ກໍມີຫຼາຍໆຄົນທີ່ມີສະພາບຄືກັບທ້າວຖຸຍນີ້ ຫາກສິ້ນຫວັງກໍກັບມາໂຮງຮຽນເກົ່າຂອງພວກເຈົ້າເດີ້ຄູພ້ອມທີ່ຈະຮັບຟັງເລື່ອງລາວຂອງເຈົ້າທຸກເວລາ. ສຸດທ້າຍນີ້ ອາຈານຂໍອວຍພອນໃຫ້ນ້ອງຈົ່ງສົມຫວັງເດີ ທ ຖຸຍ. ອາຈານກໍຊ່ວຍເຈົ້າໄດ້ພຽງເທົ່ານີ້ ຖ້າຫາກວ່າພວກນ້ອງ ຫຼື ຜູ້ໃຈບຸນຕ້ອງການມອບເຄື່ອງ ຫຼື ວັດຖຸປັດໃຈຊ່ວຍເຫຼືອລາວ ແມ່ນໃຫ້ໄປມອບໃຫ້ການຈັດຕັ້ງໂຮງຮຽນພວກເຮົາໄດ້ຕະຫຼອດ 24 ຊົ່ວໂມງ. ພວກເຮົາຈະນໍາເອົາເຄື່ອງດັ່ງກ່າວໄປສົ່ງເຖິງບ້ານລາວ ເພາະທ້າວຖຸຍລາວໄດ້ເດີນທາງກັບບ້ານໄປເຮັດໄຮ່ຊ່ວຍເມຍລາວຢູ່ບ້ານພຸ້ນແລ້ວ.ຫຼື ໂທ: 021 740286(ຮພຊ) ຫຼື ຕິດຕໍ່ຂ້າພະເຈົ້າໂດຍກົງກໍໄດ້ 020 99955572(ອຈ ຄຳຫ່ອງ ສີບູນເຮືອງ). ຫຼື ໂທຫາ ທ່ານ ຮສ. ປອ. ຄຳພຸດ ພົມມະສອນ ຜູ້ອຳນວຍການໂຮງຮຽນ 020 22222125

ຂອບໃຈທຸກຄົນທີ່ໄດ້ຮ່ວມເຮັດບຸນນໍາອາຈານຄັ້ງນີ້ ຂໍຄວາມເພີ່ມເຕີມ(26/7/2020): ເນື່ອງຈາກຫຼາຍຄົນຕ້ອງການບໍລິຈາກຊ່ວຍເຫຼືອລາວຜ່ານທາງບັນຊີ ຂໍໃຫ້ບັນດາທ່ານສົ່ງເຂົ້າບັນຊີຂອງຂ້າພະເຈົ້າທີເລກບັນຊີ 010-12-00-00468503-001(KHAMHONG SIBOUNHEUANG MR) ທະນາຄານການຄ້າຕ່າງປະເທດລາວ

ຂ້າພະເຂົ້າຂໍສັນຍາແລະສາບານວ່າ: ຈະນໍາເອົາເງິນ ແລະ ວັດຖຸປັດໃຈຂອງທ່ານໄປມອບໃຫ້ເຖິງມືລາວ ຂໍໃຫ້ທ່ານ ຂຽນຊື່ ນາມສະກຸນ, ບ້ານຢູ່ປັດຈຸບັນ ແລະ ເບີໂທ…ໃຫ້ຢ່າງລະອຽດສົ່ງໃຫ້ຂ້າພະເຈົ້າ ແລ້ວຂ້າພະເຈົ້າຈະບັນທຶກວີດີໂອການມອບ-ຮັບ (ຈະເຮັດເປັນປ້າຍລາຍລະອຽດຂອງທ່ານ ພ້ອມດ້ວຍຄໍາຂອບໃຈຈາກທ້າວຖຸຍ ແລ້ວສົ່ງຄືນໃຫ້ທ່ານ ແລະ ສັງຄົມຮັບຊາບ)

ຂ່າວທົ່ວໄປ