ການຄ້າ ນວ ທຳລາຍປາໝຶກມີສານປົນເປື້ອນ 560 ກິໂລ ອັນຕະລາຍທັງນັ້ນ

ການຄ້າ ນວ ທຳລາຍປາໝຶກມີສານປົນເປື້ອນ 560 ກິໂລ ອັນຕະລາຍທັງນັ້ນ

ຂປລ. ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ, ໄດ້ຢຶດ ແລະ ທຳລາຍ ປາໝຶກແຊ່ໂຊດາໄຟ ທີ່ມີສານຟໍມາລີນປົນເປື້ອນ ນ້ຳໜັກ 560 ກິໂລກຣາມ, ມູນຄ່າ 6 ລ້ານກວ່າກີບ, ຊຶ່ງໄດ້ຈັດຂຶ້ນ ໃນວັນທີ 2 ຕຸລາ 2020 ທີ່ສະໜາມບຳບັດຂີ້ເຫຍື້ອ ຫລັກ 32 ບ້ານນາຜາສຸກ ເມືອງໄຊທານີ ນະຄອນຫລວງວຽງຈັນ

ຂປລ. ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ, ໄດ້ຢຶດ ແລະ ທຳລາຍ ປາໝຶກແຊ່ໂຊດາໄຟ ທີ່ມີສານຟໍມາລີນປົນເປື້ອນ ນ້ຳໜັກ 560 ກິໂລກຣາມ, ມູນຄ່າ 6 ລ້ານກວ່າກີບ, ຊຶ່ງໄດ້ຈັດຂຶ້ນ ໃນວັນທີ 2 ຕຸລາ 2020 ທີ່ສະໜາມບຳບັດຂີ້ເຫຍື້ອ ຫລັກ 32 ບ້ານນາຜາສຸກ ເມືອງໄຊທານີ ນະຄອນຫລວງວຽງຈັນ.

ທ່ານ ສຳເລັດ ເພັດພອນສັກ ຫົວໜ້າຂະແໜງການຄ້າພາຍໃນ ກ່າວວ່າ: ເພື່ອປະຕິບັດຕາມແຜນ ການ ການເຄື່ອນໄຫວວຽກງານຂອງພະແນກ ອຸດສາຫະກຳ ແລະ ການຄ້າ ນະຄອນຫລວງວຽງຈັນ, ໂດຍສະເພາະ ວຽກງານຕ້ານ ແລະ ສະກັດກັ້ນການຄ້າຂາຍເຖື່ອນ-ຄ້າຂາຍນອກລະບົບ ທຸກຮູບແບບ, ການຂາຍ ແລະ ສະໜອງອາຫານ ໃຫ້ແກ່ສັງຄົມບໍ່ມີຄວາມປອດໄພ, ບໍ່ໄດ້ມາດຕະຖານ, ເຈືອປົນ, ປົນເປື້ອນສານເຄມີ ຫລື ໝົດອາຍຸການບໍລິໂພກ, ໄລຍະຜ່ານມາ ພະແນກອຸດສາຫະກຳ ແລະ ການຄ້າ ນະ ຄອນຫລວງວຽງຈັນ, ໄດ້ເອົາໃຈໃສ່ໃນການຕິດຕາມກວດກາ ຢ່າງເປັນປະຈໍາ , ຊຶ່ງໃນວັນທີ 30 ກັນຍາ ຜ່ານມາ ເຈົ້າໜ້າທີ່ກວດກາການຄ້າພະແນກ ອຸດສາຫະກຳ ແລະ ການຄ້າ ນະຄອນຫລວງວຽງຈັນ ໄດ້ສົມທົບກັບ ຫ້ອງການອຸດສາຫະກໍາ ແລະ ການຄ້າ ເມືອງນາຊາຍທອງ ແລະ ອົງການປົກຄອງ ບ້ານນາງ່າ ລົງກວດກາສະຖານທີ່ປຸງແຕ່ງປາໝຶກແຊ່ ຕັ້ງຢູ່ບ້ານນາງ່າ ເມືອງນາຊາຍທອງ ຜ່ານການກວດກາພົບເຫັນປາໝຶກແຊ່ໂຊດາໄຟ ຈໍານວນ 560 ກິໂລ ບໍ່ພົບເອກະສານຢັ້ງຢືນແຫລ່ງທີ່ມາ ເປັນຕົ້ນ: ໃບແຈ້ງເສຍພາສີ ແລະ ໃບຢັ້ງຢືນສຸຂະນາໄມສັດ. ດັ່ງນັ້ນ, ທາງເຈົ້າໜ້າທີ່ໄດ້ຢຶດເອົາປາໝຶກແຊ່ໂຊດາໄຟ ແລະ ກວດຫາສານຕົກຄ້າງ ພົບເຫັນສານເຄມີຟໍມາລີນປົນເປື້ອນ ບໍ່ສາມາດບໍລິໂພກໄດ້.

ທ່ານ ນັນຕາ ສານຸວົງ ຮອງຫົວໜ້າພະແນກອຸດສາຫະກຳ ແລະ ການຄ້າ

ນະຄອນຫລວງວຽງຈັນ ກ່າວວ່າ: ພະແນກອຸດສາຫະກຳ ແລະ ການຄ້າ

ນະຄອນຫລວງວຽງຈັນ, ຈະສືບຕໍ່ກວດກາສະກັດກັ້ນການນຳເຂົ້າ ບໍ່ຖືກຕ້ອງຕາມລະບຽບການ ແລະ ເປັນການປົກປ້ອງຜົນປະໂຫຍດຂອງຜູ້ບໍລິໂພກ ໃຫ້ໄດ້ບໍລິໂພກສິນຄ້າທີ່ມີຄຸນນະພາບ ແລະ ບໍ່ເປັນອັນຕະລາຍຕໍ່ຊີວິດ ແລະ ເຜີຍແຜ່ລະບຽບການໃຫ້ແກ່ຜູ້ຜະ ລິດ, ຜູ້ປຸງແຕ່ງ ແລະ ຜູ້ຈຳໜ່າຍສິນຄ້າໄດ້ຮັບຊາບ ເພື່ອບໍ່ໃຫ້ນຳເອົາສິນຄ້າ ທີ່ບໍ່ໄດ້ຄຸນນະພາບ, ເຈືອນປົນ, ປົນເປື້ອນສານເຄມີ ຫລື ໝົດອາຍຸມາຈຳໜ່າຍ, ພ້ອມຮຽກຮ້ອງໃຫ້ອຳນາດການປົກຄອງທ້ອງຖິ່ນບ້ານ, ເມືອງ ແລະ ທຸກພາກສ່ວນໃນສັງຄົມ ຮ່ວມມືຊ່ວຍເປັນຫູເປັນຕາ ຫາກພົບເຫັນການຜະລິດ, ປຸງແຕ່ງ ແລະ ຈໍາໜ່າຍສິນຄ້າ ບໍ່ຖືກຕ້ອງຕາມລະບຽບການ, ສິນຄ້າໝົດອາຍຸ ຫລື ສິນຄ້າທີ່ຜິດຕໍ່ລະບຽບກົດໝາຍ ສາມາດແຈ້ງເຈົ້າໜ້າທີ່ກວດກາການຄ້າທຸກຂັ້ນ ຫລື ແຈ້ງສາຍດ່ວນປົກປ້ອງສິດຜົນປະໂຫຍດຜູ້ຊົມໃຊ້ 1510 ກົມການຄ້າພາຍໃນ, ກະຊວງອຸດສາຫະກຳ ແລະ ການຄ້າ ເພື່ອຈຳກັດບໍ່ໃຫ້ສິນຄ້າດັ່ງກ່າວແຜ່ລາມ ຫລື ມີຈຳໜ່າຍ ຢູ່ນະຄອນຫລວງວຽງຈັນ ຢ່າງເດັດຂາດ.

ຂ່າວ: ເສດຖະກິດ-ການຄ້າ

ຂ່າວທົ່ວໄປ