RIP (ຕາຍແລ້ວ) ປາຂ່າ ໂຕສຸດທ້າຍໃນນ້ຳຂອງເຂດຊາຍແດນລາວ-ກຳປູເຈຍ

RIP (ຕາຍແລ້ວ) ປາຂ່າ ໂຕສຸດທ້າຍໃນນ້ຳຂອງເຂດຊາຍແດນລາວ-ກຳປູເຈຍ

ປາຂ່າ ຫຼື ໂລມາອີຣະວະດີ ໂຕສຸດທ້າຍໃນນໍ້າຂອງເຂດຊາຍແດນລາວ-ກຳປູເຈຍໄດ້ຖືກພົບວ່າຕາຍແລ້ວຕັ້ງແຕ່ວັນທີ 15 ກຸມພາ 2022. ອົງການ WWF ປະຈຳລາວໄດ້ກ່າວໃນເວັບໄຊທາງການວ່າ ການຕາຍຂອງປາຂ່າໂຕນີ້ສະແດງອອກເຖິງການສູນພັນລະດັບຊາດສຳລັບປະເທດລາວ. ທັງນີ້ ປາຂ່າຖືກປະກາດວ່າ “ສູນພັນຕາມທຳມະຊາດ” (functionally extinct ເຊິ່ງໝາຍເຖິງການທີ່ມີສະມາຊິກໃນທຳມະຊາດບໍ່ພຽງພໍທີ່ຈະຜະລິດປະຊາກອນຮຸ່ນຕໍ່ໄປໄດ້) ຕັ້ງແຕ່ປີ 2016 ເຊິ່ງຕອນນັ້ນມີປາຂ່າໃນເຂດນັ້ນເຫຼືອພຽງ 3 ໂຕເທົ່ານັ້ນ. ໃນຂະນະທີ່ໃນນໍ້າຂອງເຂດກຳປູເຈຍ ມີປາຂ່າເຫຼືອປະມານ 89 ໂຕ ອີງຕາມກາມສຳຫຼວດໃນປີ 2020.

ອີງຕາມການລາຍງານຂອງ PhnomPenh Post, ປາຂ່າໂຕນີ້ຖືກພົບວ່າເສຍຊີວິດຢູ່ໃກ້ກັບຕາຝັ່ງບໍລິເວນທີ່ມັນອາໄສຢູ່. ປາຂ່ານີ້ອາດຈະຕາຍເນື່ອງຈາກບໍ່ສາມາດທົນຕໍ່ບາດແຜ ຍ້ອນມັນໄດ້ຮັບບາດເຈັບ ຈຶ່ງເຈັບປ່ວຍ. Srey Sam Vichet ຫົວໜ້າອົງການປະມົງແຂວງ Stung Treng ຂອງກຳປູເຈຍກ່າວວ່າ ເບື້ອງຕົ້ນຄາດວ່າມັນອາດຕາຍຈາກບາດແຜທີ່ເກີດຈາກມອງຫາປາ ແນວໃດກໍຕາມຍັງຈະມີການສືບສວນ ແລະ ຊັນນະສູດຊາກສົບເພີ່ມ ກ່ອນທີ່ຈະໄດ້ຂໍ້ສະຫຼຸບເຖິງສາເຫດທີ່ແທ້ຈິງ.

ທ່ານ Lan Mercado ຜູ້ອຳນວຍການອົງການ WWF ປະຈຳອາຊີ-ປາຊີຟິກກ່າວວ່າ ທາງ WWF ຮູ້ສຶກເສຍໃຈເປັນຢ່າງຍິ່ງຕໍ່ກັບການຕາຍຂອງປາຂ່າໂຕສຸດທ້າຍທີ່ພວກເຮົາຮູ້ຈັກໃນອ່າງນໍ້າຂອງເຂດຊາຍແດນລາວ-ກຳປູເຈຍ. ຈຳນວນຂອງປາຂ່າໃນອ່າງນໍ້າດັ່ງກ່າວໄດ້ຫຼຸດລົງຫຼາຍໃນບໍ່ເທົ່າໃດປີທີ່ຜ່ານມາ ເນື່ອງຈາກໄພຄຸກຄາມຫຼາຍຢ່າງລວມທັງ ການກໍ່ສ້າງເຂື່ອນໄຟຟ້ານໍ້າຕົກ ເຊິ່ງໄດ້ສ້າງການລົບກວນຕໍ່ກະແສນໍ້າ ແລະ ຄວາມອຸດົມສົມບູນຂອງປາທີ່ຫຼຸດລົງ, ການຈົມນໍ້າຕາຍຈາກການຕິດໃນມອງຫາປາ ແລະ ການນຳໃຊ້ວິທີຫາປາທີ່ດັບສູນ ເຊັ່ນ: ໃຊ້ໄຟຟ້າຊັອດ ຫຼື ການຫາປາທີ່ຫຼາຍເກີນໄປ.

ສຳລັບປາຂ່າທີ່ຕາຍນີ້ ມີອາຍຸ 25 ປີ, ເພດຜູ້ ມີຄວາມຍາວລຳໂຕ 260 ຊັງຕີແມັດ ແລະ ໜັກ 110 ກິໂລກຣາມ ເຊື່ອກັນວ່າມັນໄດ້ຕາຍໄດ້ປະມານ 3 ມື້ແລ້ວ.

ຂ່າວເກົ່າ

ເດີນທາງສູ່ມະຫານະທີສີພັນດອນ ແມ່ນໍ້າຂອງແຫ່ງລາວໃຕ້ທີ່ເຕັມໄປດ້ວຍເກາະດອນນ້ອຍໃຫຍ່ຈຳນວນຫຼາຍ ເປັນບ່ອນຢູ່ອາໄສຂອງສັດລ້ຽງລູກດ້ວຍນໍ້ານົມຊະນິດໜຶ່ງທີ່ອາໄສຢູ່ໃນນໍ້າ ແລະ ຕອນນີ້ພວກມັນກໍມີປະຊາກອນເຫຼືອພຽງແຕ່ 3 ໂຕສຸດທ້າຍເທົ່ານັ້ນຢູ່ໃນລາວ.

“ປາຂ່າ” ສັດທີ່ເປັນສັນຍາລັກຂອງແຂວງຈຳປາສັກ ເປັນຈຸດເດັ່ນອັນໜຶ່ງທີ່ຜູ້ໄປຢ້ຽມຢາມ “ດອນຄອນ” ຕ່າງກໍຢາກພົບເຫັນ ເພາະວ່າຕອນນີ້ມີຈຳນວນໜ້ອຍຫຼາຍແລ້ວຈົນເຖິງຂັ້ນອົງການອະນຸຮັກສິ່ງແວດລ້ອມ WWF ໄດ້ອອກມາປະກາດເມື່ອປີ 2016 ວ່າ ປາຂ່າທີ່ເຫຼືອພຽງ 3 ໂຕໃນເຂດນໍ້າຂອງປະເທດລາວນັ້ນ ຖືໄດ້ວ່າເປັນການສູນພັນຕາມທຳມະຊາດແລ້ວ ນັ້ນໝາຍຄວາມວ່າຈຳນວນສະມາຊິກທີ່ເຫຼືອຢູ່ ບໍ່ສາມາດຜະລິດປະຊາກອນຮຸ່ນໃໝ່ອອກມາໄດ້ແລ້ວ. ໂຕເລກນີ້ກົງກັນກັບຂໍ້ມູນທີ່ຄົບຂັບເຮືອບອກພວກເຮົາໃນຂະນະທີ່ນັ່ງເຮືອອອກໄປເບິ່ງສັດຫາຍາກນີ້.

ປາຂ່າ ຫຼື ໂລມາອີຣະວະດີ ເປັນສັດລ້ຽງລູກນໍ້ານົມໃນຕະກຸນໂລມານໍ້າຈືດ ເຊິ່ງອາໄສຢູ່ໃນເຂດພາກພື້ນອາຊີຕາເວັນອອກສ່ຽງໃຕ້ ປະກອບມີ: ລາວ, ກຳປູເຈຍ, ມຽນມາ ເປັນຕົ້ນ ແລະ ຍັງພົບຢູ່ທີ່ແມ່ນໍ້າຄົງຄາໃນເຂດອາຊີໃຕ້ອີກດ້ວຍ.

ໂລມາອີຣະວະດີ ຢູ່ໃນເບງການຕາເວັນຕົກ ພາບຖ່າຍໄວ້ເມື່ອເດືອນສິງຫາ 2019 ໂດຍDibyendu Ash

ຢູ່ລາວ ບ່ອນທີ່ສາມາດພົບເຫັນປາຂ່າກຸ່ມສຸດທ້າຍໄດ້ນັ້ນ ແມ່ນຢູ່ທີ່ວັງສະຫງວນເຂດບ້ານຫາງຄອນ ດອນຄອນ ເມືອງໂຂງ ແຂວງຈຳປາສັກເຊິ່ງມີຊາຍແດນຕິດຈອດກັນກັບປະເທດກຳປູເຈຍ.

ການເດີນທາງໄປດອນຄອນສາມາດເຮັດໄດ້ໂດຍການນັ່ງລົດໄປລົງທີ່ບ້ານນາກະສັງ (ຖ້າໄປລົດສ່ວນຕົວກໍມີບ່ອນໃຫ້ຝາກລົດ ໃນລາຄາ 20,000 ກີບຕໍ່ມື້) ແລະ  ຂີ່ເຮືອໂດຍສານຕໍ່ໄປລົງທີ່ດອນເດດ ຫຼື ດອນຄອນກໍໄດ້ ເພາະທັງສອງດອນນີ້ມີຂົວຕິດຈອດໃສ່ກັນ.

ຂົວເກົ່າທີ່ເຊື່ອມຕໍ່ລະຫວ່າງດອນຄອນ ແລະ ດອນເດດ

ບ້ານຫາງຄອນຈະເປັນຈຸດທີ່ຢູ່ໃຕ້ສຸດຂອງດອນຄອນ ແລະ ມີບໍລິການເຮືອຮັບຈ້າງຫຼາກຫຼາຍລາຄາ ເພື່ອພາອອກໄປເບິ່ງປາຂ່າກຸ່ມສຸດທ້າຍທີ່ເຫຼືອຢູ່ໃນແມ່ນໍ້າຂອງຝັ່ງລາວ.

ໂຊກດີກໍຈະເຫັນປາຂ່າຂຶ້ນມາຫາຍໃຈເປັນໄລຍະໆ ອາດຈະບໍ່ເຫັນໝົດໂຕ ຫຼື ສ່ວນຫົວ ແຕ່ໃນສ່ວນທີ່ເປັນຫຼັງຂອງພວກມັນແມ່ນສາມາດແນມເຫັນໄດ້ຢ່າງຊັດເຈນ. ເວລາທີ່ພວກເຮົາໄປເບິ່ງປາຂ່ານີ້ ແມ່ນໄປໃນຕອນເຊົ້າ ເຊິ່ງຖືວ່າໂຊກດີຫຼາຍ ເພາະໄດ້ເຫັນແບບເຕັມໆຕາເປັນຄັ້ງທຳອິດໃນຊີວິດ.

ໄພຄຸກຄາມທີ່ເຮັດໃຫ້ຈຳນວນປາຂ່າຫຼຸດໜ້ອຍຖອຍລົງຫຼາຍແມ່ນຍ້ອນການຫາປາດ້ວຍມອງ. ອົງການ WWF ໄດ້ຮຽກຮ້ອງໃຫ້ລັດຫ້າມໃຊ້ມອງຫາປາໃນເຂດອາໄສຂອງປາຂ່າ

ໃຜທີ່ຢາກໄປຊົມປາຂ່າກຸ່ມສຸດທ້າຍຂອງລາວ ສາມາດເດີນທາງໄປເບິ່ງໄດ້ທີ່ບ້ານຫາງຄອນ ເມືອງໂຂງ ແຂວງຈຳປາສັກ ແລະ ອີກຢ່າງໜຶ່ງທີ່ສຳຄັນກໍຄື ທ່ອງທ່ຽວຢ່າງມີຄວາມຮັບຜິດຊອບ ບໍ່ຖິ້ມຂີ້ເຫຍື້ອຊະຊາຍ ຫຼື ຖິ້ມລົງນໍ້າ ເພື່ອຮັກສາສິ່ງແວດລ້ອມຊ່ວຍກັນ.

ຂ່າວທົ່ວໄປ