ຈາລະຈອນ ນະຄອນຫຼວງ ສັ່ງເຂັ້ມງວດ ຫ້າມໃຊ້ສວຍການປະຕິບັດໜ້າທີ່ວຽກງານ ເພື່ອຫາຜົນປະໂຫຍດສ່ວນຕົວ

ຈາລະຈອນ ນະຄອນຫຼວງ ສັ່ງເຂັ້ມງວດ ຫ້າມໃຊ້ສວຍການປະຕິບັດໜ້າທີ່ວຽກງານ ເພື່ອຫາຜົນປະໂຫຍດສ່ວນຕົວ

ຈະລາຈອນ ນວ ເຊື່ອມຊຶມທິດຊີ້ນໍາຂອງລັດຖະມົນຕີກະຊວງ ປກສ ເພື່ອຫຼີກລ້ຽງຫາງສຽງຈາກສັງຄົມ

ໃນຕອນເຊົ້າຂອງວັນທີ 17 ມັງກອນ 2020, ຢູ່ຫ້ອງປະຊຸມກອງບັນຊາການ ປກສ ນວ ພັອ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ໄດ້ເຜີຍແຜ່ ທິດຊີ້ນໍາຂອງລັດຖະມົນຕີກະຊວງ ປກສ ກ່ຽວກັບວຽກງານຈະລາຈອນ ໃຫ້ກໍາລັງຕໍາຫຼວດຈະລາ ຈອນ ນວ ໄດ້ຮັບຮູ້ ແລະ ພ້ອມກັນຈັດຕັ້ງປະຕິບັດ ເປັນຕົ້ນແມ່ນ: ການຕັ້ງຈຸດກວດກາພາຫະນະ, ການລ໋ອກລໍ້ ແລະ ການໄລ່ລົດ, ການດໍາເນີນຄະດີ ແມ່ນໃຫ້ຖືກຕາມລະບຽບຫຼັກການ ແລະ ເປັນທໍາ,ບໍ່ສວຍໃຊ້ການປະຕິບັດໜ້າທີ່ວຽກງານ ເພື່ອຫາຜົນປະໂຫຍດສ່ວນຕົວ, ອໍານວຍຄວາມສະດວກໃຫ້ຜູ້ໃຊ້ລົດ-ໃຊ້ຖະໜົນດ້ວຍຄວາມໂປ່ງໃສ່ ເພື່ອຫຼີກລ່ຽງຫາງສຽງທີ່ບໍ່ດີຈາກສັງຄົມ ຕໍ່ກັບການປະຕິບັດໜ້າທີ່ຂອງກຳລັງຈະລາຈອນ

ການຈັດຕັ້ງເຊື່ອມຊືມທິດຊີ້ນໍາຂອງລັດຖະມົນຕີ ກະຊວງ ປກສ ຄັ້ງນີ້ ແມ່ນຈັດຂຶ້ນໂດຍການເປັນປະທານຂອງ ພັທ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການ ປກສ ນວ,ໃຫ້ກຽດເຜີຍແຜ່ໂດຍ ພັອ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ, ໂດຍມີຫົວໜ້າ-ຮອງພະແນກຕໍາຫຼວດຈະລາຈອນທົ່ວ ນວ ແລະ ຫົວໜ້າກອງຮ້ອຍຈະລາຈອນ 9 ຕົວເມືອງ, ພ້ອມດ້ວຍພາກສວນທີ່ກ່ຽວຂ້ອງເຂົ້າຮ່ວມ 200 ກວ່າສະຫາຍ, ຍິງ 5 ສະຫາຍ

ໃນພິທີ ພັທ ບຸນມາກ ສູນດາໄລ ຮອງຫົວໜ້າພະແນກຕໍາຫຼວດຈະລາຈອນ ປກສ ນວ ຍັງໄດ້ຂຶ້ນຜ່ານບົດສະຫຼຸບໂດຍຫຍໍ້ກ່ຽວກັບການຈັດຕັ້ງປະຕິບັດໜ້າທີ່ວຽກງານຂອງເຈົ້າໜ້າທີ່ຕໍາຫຼວດ ຈະລາຈອນ ນວ ໃນປີ 2019 ໂດຍໃຫ້ຮູ້ວ່າ: ໄລຍະ 1 ປີຜ່ານມາຕຳຫຼວດຈະລາຈອນ ນວ ໄດ້ເອົາໃຈໃສ່ລົງໂຄສະນາເຜີຍແຜ່ກົດລະບຽບຈະລາຈອນທາງຫຼວງ ແລະ ກົດໝາຍ ຢູຕາມສໍານັກງານ-ອົງການ, ໂຮງຈັກ-ໂຮງງານ, ໂຮງຮຽນ, ໂຮງໝໍ ແລະ ຢູ່ບັນດາບ້ານ ລວມມີ 198 ຄັ້ງ

ນອກຈາກນີ້ຍັງໄດ້ລະບາຍການສັນຈອນ ຢູ່ຈຸດທີ່ມີຄວາມສັບສົນ ແລະ ທາງ 3 ແຍກ, 4 ແຍກຕາມສາຍທາງໃນຊົ່ວໂມງຮີບດ່ວນ, ໄດ້ຕັ້ງດ່ານກວດກາການໃຊ້ຄວາມໄວຂອງນັກຂັບຂີ່; ເຊິ່ງສາມາດກວດກາພົບນັກຂັບຂີ່ທີ່ມີທາດເຫຼົ້າເກີນ 0,24 ມີລີກຣາມຈໍານວນ 438 ຄົນ, ເກີນ 0,26 ມີລີກຣາມ 96 ຄົນ ແລະ ກັກຕົວຜູ້ຖືກຫາໄດ້ຈໍານວນ 63 ຄົນ, ຍິງ 6 ຄົນ ກັກຢາເສບຕິດໄດ້ 7 ລ້ານກວ່າເມັດ, ຢາໄອ 786 ກິໂລກະຣາມ, ປືນ 2 ກະບອກ ພ້ອມລູກປືນຈໍານວນ 22 ລູກ, ໃນນີ້ເຈົ້າໜ້າທີຕຳຫຼວດຈະລາຈອນ ນວ ຍັງໄດ້ເອົາໃຈໃສ່ປະຈຳການຕະຫຼອດ 24 ຊົ່ວໂມງ; ເຊິ່ງຜ່ານມາການປະຕິບັດຕົວຈິງສາມາດເກັບກຳອຸບັດຕິເຫດເກີດຂຶ້ນທັງໝົດ 1.127 ລາຍ ມີຄົນເສຍຊີວິດເຖີງ 205 ຄົນ

ຂ່າວ : ປ້ອງກັນຄວາມສະຫງົບນະຄອນຫຼວງວຽງຈັນ

ຂ່າວທົ່ວໄປ