ເຈົ້າໜ້າທີ່ກວດກາເຂັ້ມງວດ ສະກັດບໍ່ໃຫ້ໂຈນປຸ້ນຮ້ານຄຳໜີມາລາວ

ເຈົ້າໜ້າທີ່ກວດກາເຂັ້ມງວດ ສະກັດບໍ່ໃຫ້ໂຈນປຸ້ນຮ້ານຄຳໜີມາລາວ

ຈາກເຫດການທີ່ຊາຍໜຸ່ມບຸກປຸ້ນຮ້ານຄຳໃນສູນການຄ້າຢູ່ແຂວງລົບບຸຣີຂອງໄທ ເຮັດໃຫ້ມີຜູ້ເສຍຊີວິດ ແລະ ບາດເຈັບຈຳນວນຫຼາຍ ເຊິ່ງເຈົ້າໜ້າທີ່ກຳລັງເລັ່ງຕາມຈັບກຸມໂຕ ຫຼ້າສຸດເຈົ້າໜ້າທີ່ກວດຄົນເຂົ້າເມືອງໜອງຄາຍ ດ່ານຂົວມິດຕະພາບລາວ-ໄທ 1 ໄດ້ເພີ່ມຄວາມເຂັ້ມງວດກວດກາລົດ ແລະ ບຸກຄົນຜ່ານດ່ານ ຫຼັງພົບຊາຍທີ່ຖືກສົງໄສມີລັກສະນະຄ້າຍຄືກັບຜູ້ຮ້າຍປຸ້ນຮ້ານຄຳດັ່ງກ່າວໃນພື້ນທີ່ແຂວງໜອງຄາຍ ເພື່ອບໍ່ໃຫ້ຫຼົບໜີມາທີ່ລາວ

ວັນທີ 20 ມັງກອນ 2020 ສື່ໄທລາຍງານວ່າ ທີ່ດ່ານຊາຍແດນຂົວມິດຕະພາບລາວ-ໄທ ແຫ່ງທີ 1 ແຂວງໜອງຄາຍ ປະເທດໄທ ເຈົ້າໜ້າທີ່ກວດກາຄົນເຂົ້າເມືອງໜອງຄາຍ ແລະ ເຈົ້າໜ້າທີ່ພາສີໜອງຄາຍທີ່ປະຕິບັດໜ້າທີ່ພາຍໃນດ່ານຊາຍແດນດັ່ງກ່າວ ໄດ້ຮ່ວມກັນເພີ່ມຄວາມເຂັ້ມງວດໃນການກວດກາລົດ ແລະ ບຸກຄົນທີ່ຜ່ານເຂົ້າ-ອອກດ່ານດັ່ງກ່າວ ຫຼັງຈາກທີຜູ່້ບັນຊາການຕຳຫຼວດແຫ່ງຊາດເຜີຍວ່າ ພົບຊາຍຕ້ອງສົງໄສຄ້າຍຄືກັບຄົນຮ້າຍປຸ້ນຄຳທີ່ລົບບຸຣີ ໃນພື້ນທີ່ແຂວງໜອງຄາຍ ເພື່ອປ້ອງກັນຜູ້ຕ້ອງສົງໄສວ່າຈະເປັນຄົນຮ້າຍຫຼົບໜີມາຍັງປະເທດລາວ

ເຈົ້າໜ້າທີ່ກວດຄົນເຂົ້າເມືອງໜອງຄາຍ ແລະ ເຈົ້າໜ້າທີ່ພາສີໜອງຄາຍ ໄດ້ກວດກາລົດທຸກຄັນ ທັງລົດທະບຽນໄທ ແລະ ລາວ ເນັ້ນລົດທີ່ຈະເດີນທາງອອກມາທີ່ປະເທດລາວທຸກຄັນ

ນອກຈາກນີ້ຍັງໄດ້ໃຫ້ເຈົ້າໜ້າທີ່ຊຸດສືບສວນດ່ານກວດກາຄົນເຂົ້າເມືອງໜອງຄາຍ ຍ່າງປົນກັບບຸກຄົນທີ່ຜ່ານເຂົ້າ-ອອກດ່ານດັ່ງກ່າວ ຮວມທັງອອກສືບສວນຫາຂ່າວຕາມຈຸດຈອດເຮືອປະເພນີໄທ-ລາວ ເພື່ອເປັນການປ້ອງກັນການຫຼົບໜີອອກນອກປະເທດອີກທາງໜຶ່ງ

ຂໍ້ມູນ : ThaiPost

ຂ່າວທົ່ວໄປ