ແອບອ້າງເປັນເຈົ້າໜ້າທີ່ ຕົວະເອົາເງິນຄ່າແລ່ນເອົາຄົນອອກຄຸກ

ແອບອ້າງເປັນເຈົ້າໜ້າທີ່ ຕົວະເອົາເງິນຄ່າແລ່ນເອົາຄົນອອກຄຸກ

ແອບອ້າງເປັນຕຳຫຼວດ ແລ່ນເອົາຄົນອອກຄຸກໄດ້ ສຸດທ້າຍໄດ້ເຂົ້າໄປຢູ່ຄຸກເອງ

ເລື່ອງທີ່ຈະນຳສະເໜີຕໍ່ໄປນີ້ ເປັນອີກກໍລະນີ ໜຶ່ງທີ່ຈະເຕືອນສະຕິຂອງພໍ່ແມ່ປະຊາຊົນ ທີ່ຮັກລູກ ແພງຫຼານ ແຕ່ພວກເຂົາກະທໍາຜິດຈົນຖືກດໍາເນີນຄະດີຕາມກົດໝາຍ ແລ້ວຄິດຢາກຫາທາງຊ່ວຍໃຫ້ ລູກຫຼານພົ້ນໂທດດ້ວຍການຊອກຫາຜູ້ທີ່ທ່ານຄິດວ່າອາດຈະຊ່ວຍທ່ານໄດ້ ດ້ວຍການໃຫ້ເງິນກັບຜູ້ທີ່ ແອບອ້າງຕົນວ່າມີອໍານາດໃນການແລ່ນເອົາຄົນ ອອກຈາກຄຸກໄດ້.

ດັ່ງກໍລະນີ ທີ່ມີປະຊາຊົນ ຊາວເມືອງສຸຂຸມມາ ແຂວງຈຳປາສັກ ຫຼົງເຊື້ອຊາຍບໍ່ຮູ້ຊື່ແອບອ້າງຕົນວ່າເປັນ ເຈົ້າໜ້າທີ່ຕຳຫຼວດ ແຂວງ ຈຳປາສັກ ສາມາດແລ່ນເອົາລູກອອກຈາກຄ້າຍຄຸມຂັງໄດ້ ຈິ່ງໂອນເງິນໄປໃຫ້ສຸດທ້າຍຖືກຫຼອກ.

ວັນທີ 16 ກຸມພາ 2021 ຫ້ອງຂ່າວ ປກສ ແຂວງຈຳປາສັກ ລາຍງານວ່າ: ເຈົ້າໜ້າທີ່ພະແນກ ສືບສວນ-ສອບສວນ ປກສ ແຂວງຈຳປາສັກ ໃຫ້ຮູ້ວ່າ: ໃນວັນທີ 22 ພະຈິກ 2021, ໄດ້ຮັບ ແຈ້ງຄວາມຈາກຜູ້ເສຍຫາຍ ຊື່ ນາງ ເຫຼືອງ ຢູ່ບ້ານ ໂຄກກ່ອງ ແລະ ນາງ ອ່ອນດີ ຢູ່ບ້ານປາກຊ້າງ ເມືອງ ສຸຂຸມມາ ວ່າ:

ໄດ້ມີຊາຍບໍ່ຮູ້ຊືແອບອ້າງເປັນ ເຈົ້າໜ້າທີ່ ປກສ ແຂວງຈຳປາສັກ ໂທລະສັບມາຫາ ບອກໃຫ້ໂອນເງິນໃຫ້ ຄ່ານຳສົ່ງ ທ້າວ ເຫຼືອງ ແລະ ທ້າວ ລາດ ທີ່ຖືກກັກຕົວຢູ່ຄ້າຍຄຸມຂັງ-ດັດສ້າງ ປກສ ແຂວງຈຳປາສັກ ໂດຍບອກວ່າ ທັງສອງປ່ວຍແຮງໄດ້ນຳຕົວອອກມາປິ່ນປົວ. ຈາກນັ້ນ, ນາງ ເຫຼືອງ ໄດ້ໂອນເງິນໃຫ້ຈຳນວນ 2.000.000 ກີບ ແລະ ນາງ ອ່ອນດີ ໂອນເຂົ້າບັນຊີດຽວກັນ ຈຳນວນ 3.000.000 ກີບ.

ພາຍຫຼັງໄດ້ຮັບແຈ້ງຄວາມແລ້ວ, ເຈົ້າໜ້າທີ່ ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງ ເກັບກຳ ຂໍ້ມູນຫຼັກຖານຕິດຕາມເປົ້າໝາຍ, ມາຮອດວັນທີ 31 ທັນວາ 2021, ຈຶ່ງສາມາດກັກຕົວຜູ້ຖືກຫາໄດ້ ຊື່ ທ້າວ ເພ່ຍ ອາຍຸ 35 ປີ ປະຊາ ຊົນຢູ່ບ້ານໜອງແຕ້ ເມືອງຈໍາປາສັກ ແຂວງຈຳປາສັກ.

ຜູ້ກ່ຽວໄດ້ຮັບສາລະພາບກັບເຈົ້າໜ້າທີ່ວ່າ: ໃນ ປີ 2019, ຜູ້ກ່ຽວ ໄດ້ຖືກເຈົ້າໜ້າທີ່ກັກຕົວໃນຂໍ້ຫາ ສໍ້ໂກງຊັບ ແລະ ຖືກສາຕັດສິນຈໍາຄຸກ 1 ປີ 6 ເດືອນ ພາຍຫຼັງທີ່ພົ້ນໂທດກໍໄດ້ສ້າງຄອບຄົວກັບນາງ ຄໍາ ຢູ່ບ້ານໂນນແດງ ເມືອງສຸຂຸມມາ, ມາຮອດທ້າຍປີ 2021,

ຈາກນັ້ນ, ແມ່ຂອງທ້າວ ສາຍ ໄດ້ເອົາເງິນໃຫ້ຜູ້ກ່ຽວ ຈຳນວນ 600.000 ກີບ ແລະ ເຂົ້າສານ 1 ກະສອບ. ຜ່ານໄປ 2 ວັນ ແມ່ ຂອງທ້າວ ສາຍ ໄດ້ໂທມາຫາຜູ້ກ່ຽວວ່າ ມີພີ່ນ້ອງ ຢາກແລ່ນເອົາລູກອອກຈາກຫ້ອງຂັງ; ຜູ້ກ່ຽວຕອບ ກັບໄປວ່າ ຖ້າຢາກເອົາອອກຈາກຄຸມຂັງ ຕ້ອງໃຊ້ເງິນຈຳນວນ 6.000.000 ກີບ.

ຈາກນັ້ນ, ຜູ້ກ່ຽວໄດ້ໂທບອກຜູ້ທີ່ຢາກແລ່ນ ເອົາລູກອອກຈາກຄ້າຍຄຸມຂັງ ໂອນເງິນໃຫ້ກ່ອນ 3.000.000 ກີບ ຜ່ານບັນຊີຂອງທ້າວ ຊົມ, ຕໍ່ມາ ຜູ້ກ່ຽວໄດ້ໄປເອົາເງິນນຳທ້າວ ຊົມ ແລ້ວເອົາມາໃຊ້ ຈ່າຍຈົນໝົດ ຫຼັງຈາກນັ້ນ, ກໍໄດ້ຕົວະ ເອົາເງິນນໍາ ພີ່ນ້ອງຂອງຜູ້ທີ່ຖືກກັກຕົວຢູ່ຄຸມຂັງ-ດັດສ້າງ ຈຳນວນຫຼາຍຄົນ ໃນນີ້ລວມທັງຜູ້ເສຍຫາຍທັງສອງ ຄົນທີ່ແຈ້ງ ຄວາມຕໍ່ເຈົ້າໜ້າທີ່ ໂດຍໄດ້ເງິນລວມ ທັງໝົດ 9.100.000 ກີບ. ມາຮອດວັນທີ 31 ທັນວາ 2021 ຈິງຖືກເຈົ້າໜ້າທີ່ກັກຕົວມາດໍາເນີນຄະດີ.

ເລື່ອງນີ້ ຈິ່ງເປັນອີກເລື່ອງໜຶ່ງທີ່ເຕືອນສະຕິສັງຄົມວ່າຢ່າຫຼົງເຊື່ອຄົນບໍ່ດີ ເພາະການດຳເນີນຄະດີ ແມ່ນໄປ ຕາມ ຂະບວນການທາງກົດໝາຍ ບໍ່ມີໃຜ ສາມາດແລ່ນເອົານັກໂທດອອກມາໄດ້ແບບ ງ່າຍດາຍ, ນອກຈາກນັກໂທດໄດ້ຮັບອະໄພຍະໂທດ.

ຂ່າວທົ່ວໄປ